Son onilliklər ərzində Azərbaycan enerji sektorunda həyata keçirdiyi məqsədyönlü siyasət nəticəsində mühüm iqtisadi və sosial nailiyyətlər əldə edib. Xüsusilə ölkənin zəngin enerji ehtiyatlarının səmərəli idarə olunması və beynəlxalq əməkdaşlığın genişləndirilməsi Azərbaycanın regionun aparıcı enerji mərkəzlərindən birinə çevrilməsində həlledici rol oynayıb.

 Müstəqilliyin ilk illərində ölkə ciddi iqtisadi çətinliklər, siyasi qeyri-sabitlik və enerji təminatı sahəsində problemlərlə üzləşmişdi. Həmin dövrdə enerji resurslarının strateji inkişafın əsas istiqaməti kimi müəyyənləşdirilməsi Azərbaycanın gələcək tərəqqisinin əsasını qoydu. Xəzər hövzəsinin enerji potensialının beynəlxalq investorlar üçün əlçatan olması ölkəyə böyük həcmdə sərmayələrin cəlb edilməsinə, yeni infrastruktur layihələrinin reallaşdırılmasına və iqtisadiyyatın dirçəlməsinə şərait yaratdı.

 Enerji sektorundan əldə olunan gəlirlərin səmərəli şəkildə idarə olunması nəticəsində ölkədə genişmiqyaslı sosial və iqtisadi layihələr həyata keçirildi. Müasir yol, təhsil, səhiyyə və kommunal infrastrukturun qurulması, regionların inkişafı və əhalinin sosial rifahının yüksəldilməsi bu siyasətin mühüm nəticələri kimi qiymətləndirilir.

 Bu gün Azərbaycan dayanıqlı iqtisadi göstəricilərə malik ölkələr sırasındadır. Yoxsulluq və işsizlik səviyyəsinin minimum həddə enməsi, investisiya cəlbediciliyinin artması və beynəlxalq maliyyə qurumları tərəfindən verilən yüksək reytinqlər ölkədə aparılan uğurlu iqtisadi siyasətin göstəricisidir. Eyni zamanda, xarici borcun aşağı səviyyədə saxlanılması və strateji valyuta ehtiyatlarının davamlı şəkildə artırılması ölkənin maliyyə təhlükəsizliyini daha da möhkəmləndirib.

 Azərbaycanın enerji siyasətinin mühüm istiqamətlərindən biri də ölkənin regional enerji əməkdaşlığında və tranzit imkanlarının genişləndirilməsində oynadığı roldur. Cənab Prezident İlham Əliyevin Bakı Enerji Həftəsində qeyd etdiyi kimi, Azərbaycan Xəzər dənizinin şərq sahillərində yerləşən dost və tərəfdaş dövlətlər üçün mühüm tranzit imkanları yaradır. Hazırda Mərkəzi Asiya ölkələrində hasil olunan neftin Azərbaycan üzərindən beynəlxalq bazarlara nəqli uğurla həyata keçirilir. Bu isə ölkəmizin qlobal enerji xəritəsində strateji mövqeyini daha da möhkəmləndirir. Eyni zamanda, gələcəkdə təbii qaz sahəsində də əməkdaşlıq imkanlarının genişlənməsi Azərbaycanın regional enerji təhlükəsizliyinin təmin edilməsində rolunu daha da artıracaq.

Yaşar Abdullayev

Gəncə şəhəri, Kəpəz bələdiyyəsinin sədri